लौ हेरौं पोखराका चर्चित प्रतिभाहरूको मुहारचित्र

विविध

गृहपृष्ठ
विविध
लौ हेरौं पोखराका चर्चित प्रतिभाहरूको मुहारचित्र

लौ हेरौं पोखराका चर्चित प्रतिभाहरूको मुहारचित्र

सोमबार, साउन १, २०८० एभरेष्ट पेडिया

पोखरा। समाजमा योगदान पुर्‍याउनेहरूको मुहारचित्र बनाएर चर्चित बनेका कलाकार हुन् कृष्ण मर्सानी। उनी हरेक बिहान एक जना सुपात्रको मुहारचित्र बनाउँछन्।

अनि तिनको छोटो चिनारीसहित आफ्नै फेसवुक वालमा पोष्ट गर्छन्। पेन्सिल रंगले बनाइएका उनका चित्र आकर्षक हुन्छन्। उनी सर्वसाधारणदेखि नेता, कलाकार, साहित्यकार, पत्रकार आदि विभिन्न क्षेत्रका प्रतिभाको चित्र बनाउँछन्। यसरी उनले कलामार्फत तिनको सम्मान गर्दै आएका छन्। कलाकर्मबाट अरुको सम्मान गर्दागर्दै उनी आफैं सम्मानित कलाकार बनेका छन्।

कलाकार कृष्ण मर्सानी हरेक बिहान एक जना सुपात्रको मुहारचित्र बनाउँछन्। अनि तिनको छोटो चिनारीसहित आफ्नो फेसवुक वालमा पोष्ट गर्छन्।

उनले आफ्नो ‘बसिबियाँलो’ सृङ्खलामा २८ मे २०१६ देखि नियमित मुहारचित्र बनाउन थालेका हुन्। आफ्नै मुहारचित्र बनाएर नौलो अभियान शुभारम्भ गरेका उनले सुरुका दिनमा परिवार, आफन्त र साथीहरूका चित्र बनाए। पछिल्ला दिनमा विशेषतः सामाजिक जीवनमा योगदान पुर्‍याउनेका चित्र कोर्दै आएका छन्।

साउने संक्रान्तिका दिन सोमबारसम्म उनले बसिबियाँलो सृङ्खलामा २५९१ ओटा मुहारचित्र बनाइसकेका छन्। विगतमा उनी वन अनुसन्धान तथा प्रशिक्षण केन्द्र पोखरामा जागिरे थिए। त्यहाँबाट फुर्सदमा बसेको पनि केही वर्ष भैसक्यो। अचेल कलाकर्म र साहित्यिक उन्नयनका गतिविधिमा उनी सक्रिय भैराख्छन्। पोखरामा हुने विभिन्न साहित्यिक कार्यक्रममा क्रियाशील बन्छन्। घुमफिरमा पनि रुचि भएकाले बेलाबेलामा पोखरा सेरोफेरोका डाँडापाखामा डुलिरहन्छन्।