पोखरा । पर्यटन सिजनको सुरुवातसँगै पोखरामा रौनक बढ्ने अपेक्षा थियो, तर जेन–जी आन्दोलनले त्यहाँको पर्यटन व्यवसायलाई ठुलो धक्का दिएको छ । आन्दोलनका क्रममा भएको तोडफोड र आगजनीले पोखराको पर्यटन क्षेत्र धुवाँमय बनेको छ ।
व्यवसायीका अनुसार सिजनमा कम्तीमा ७० प्रतिशतसम्म बुकिङ हुने अपेक्षा थियो, तर अहिले मात्र करिब १० प्रतिशतमा सीमित भएको छ । ‘भ्रमण वर्ष २०२५’ का लागि विभिन्न कार्यक्रम तयारी भइरहेका बेला हिंसात्मक गतिविधिले सम्पूर्ण योजनामा नकारात्मक असर पारेको पर्यटन परिषदका पदाधिकारीहरूको भनाइ छ ।
परिषदका पूर्वअध्यक्ष गोपी भट्टराईका अनुसार सरकार शान्ति–सुरक्षा सुनिश्चित नगरे विदेशी पर्यटक आउन कठिन छ । विदेशी कूटनीतिक नियोगहरूले पनि आफ्ना नागरिकलाई तत्काल नेपाल भ्रमण नगर्न सुझाइरहेको व्यवसायीहरूको दाबी छ ।
आन्दोलनकै क्रममा पोखराका प्रमुख होटलहरू सरोबरसहित बरविपल रिसोर्ट, होटल गुडविल, बगैंचा रिसोर्ट एण्ड स्पामा तोडफोड र आगजनी भएको थियो । होटल सरोवरका प्रबन्ध निर्देशक प्रा.डा. भरत पहारीका अनुसार सरसफाइ सकिएको र भत्किएका संरचना पुनर्निर्माण थालिएको छ । करिब ७० करोड खर्च गरेर केही महिनाभित्रै होटल पुनः सञ्चालनमा ल्याउने तयारी भइरहेको उनले बताए ।
पोखरा होटल संघका अध्यक्ष लक्ष्मण सुवेदीले होटल क्षेत्रमा मात्रै ३ अर्बभन्दा बढीको क्षति भएको प्रारम्भिक आकलन प्रस्तुत गरे । उनका अनुसार पर्यटन उद्योग रोजगार, वैदेशिक मुद्रा आर्जन र अर्थतन्त्रमा महत्वपूर्ण आधार भएकाले पुनःउत्थान अपरिहार्य छ ।
पर्यटन परिषदका अध्यक्ष तारानाथ पहारीले सात खर्बभन्दा बढी लगानी भइसकेको पोखराको पर्यटन उद्योग अहिले सुनसान बनेको भन्दै तत्काल सरकारी पहल आवश्यक रहेको बताए । आन्तरिक पर्यटकसमेत पहिरोका कारण राजमार्ग अवरुद्ध हुँदा पोखरा सहज पुग्न नसकिरहेको र यसले संकट अझ गहिरो बनाएको व्यवसायीहरूको गुनासो छ ।
-1759837986.png)
-(1)-1759826782.jpg)
-1744786301.jpg)
-(1)-1759826782.jpg)