भिडियोमा मर्मस्पर्शी गीत ‘यहीँ दुःख गरम्ला...’

कला/संस्कृती

गृहपृष्ठ
कला/संस्कृती
भिडियोमा मर्मस्पर्शी गीत ‘यहीँ दुःख गरम्ला...’

भिडियोमा मर्मस्पर्शी गीत ‘यहीँ दुःख गरम्ला...’

आइतबार, कात्तिक २३, २०८२ एभरेष्ट पेडिया

पोखरा
गीतकार सुरज उपाध्यायको रचना र गायक विनोद बानियाँको स्वरमा रहेको गीत ‘यहीँ दुःख गरम्ला...’ को म्युजिक भिडियो सार्बजनिक भएको छ।
गीतकार प्रतिष्ठानद्वारा पोखरामा शनिबार आयोजित कार्यक्रममा नेपाल सङ्गीत तथा नाट्य प्रज्ञा प्रतिष्ठानका संस्थापक सदस्य सचिव तीर्थ श्रेष्ठले भिडियो सार्वजनिक गरेका हुन्। गीतमा सङ्गीत पनि गायक बानियाकै छ।
विदेश जाने क्रम बढिरहेको अवस्थामा स्वदेशमै दुःख गरेर भए पनि बाँच्नुपर्ने भाव समेटिएको गीतले नयाँ पुस्तालाई विदेश जानबाट किन रोक्न सकिएन भन्ने प्रश्न उठाएको छ। गीतकार उपाध्यायले ग्रामीण जीवनको यथार्थ घटनाबाट प्रेरित भएर लेखिएको गीतले मनोरञ्जन मात्र नभई सन्देश पनि दिने विश्वास व्यक्त गरे।

गायक बानियाँले आफूलाई मन परेको गीतमध्ये यो पनि एक भएको भन्दै गीतले आम दर्शकलाई मात्र होइन, सत्ता सञ्चालकलाई समेत सोच्न बाध्य बनाउने धारणा राखे। उनले सुरजको गीतले मन छोएकाले गाएको अनुभव सुनाए।
कार्यक्रमका प्रमुख अतिथि गीतकार श्रेष्ठले विनोद र सुरज पोखरामै बसेर नेपाली साहित्य र सङ्गीतका लागि गरेको योगदान अविस्मरणीय रहेको बताए। गीत लेखन कष्टकर यात्रा भएको भन्दै उनले गायक तथा सङ्गीतकारले यो मर्मलाई बुझेर प्रस्तुत गर्दा मात्र आम स्रोताले मन पराउने विचार राखे। उनले यो गीतका शब्दमाथि गायन, दृश्याङ्कन र अभिनयको तालमेल मिलेकाले पनि सफल बन्ने विश्वास व्यक्त गरे।
प्रतिष्ठानका अध्यक्ष अनुराग अधिकारीको अध्यक्षतामा भएको कार्यक्रममा कलाकार तथा निर्देशक अनुप बराल, अर्का कलाकार प्रकाश घिमिरे, म्युजिक भिडियोका निर्देशक नेत्र गुरुङलगायतले शुभकामना दिएका थिए। कार्यक्रम सञ्चालन सचिव रुपिन्द्र प्रभावीले गरेका थिए।
काव्यालयका लागि विक्रम कार्कीको प्रस्तुति रहेको गीतमा कार्कीसँगै सुषमा श्रेष्ठको अभिनय, मिलन शङ्करको छायाङ्कन तथा राजेश विष्टको सङ्गीत संयोजन रहेको छ।