टिकटकबाट पर्यटन प्रवद्र्धन अभियान

पर्यटन समाचार

गृहपृष्ठ
पर्यटन समाचार
टिकटकबाट पर्यटन प्रवद्र्धन अभियान

टिकटकबाट पर्यटन प्रवद्र्धन अभियान

बिहीबार, असोज २९, २०८३ एभरेष्ट पेडिया

काठमाडौं।
नेपाल पर्यटन बोर्ड र टिकटकको सहकार्यमा ह्यास ट्याग भिजिट नेपाल प्रवद्र्धन अभियान सुरु भएको छ। नेपालको पर्यटन प्रवद्र्धनलाई विश्वव्यापी डिजिटल माध्यममार्फत् विस्तार गर्ने उद्देश्यले यो अभियान सञ्चालन गरिएको हो।
यस अभियानमार्फत् नेपालको प्राकृतिक सौन्दर्य, हिमाल, सांस्कृतिक सम्पदा, मौलिक परम्परा, साहसिक गतिविधि तथा स्थानीय जीवनशैलीलाई सिर्जनात्मक भिडियो सामग्रीबाट विश्वभर प्रवद्र्धन गर्ने लक्ष्य लिइएको छ।
अभियानमा सहभागी हुन बोर्डले यात्राप्रेमी, सामग्री निर्माता, पर्यटन व्यवसायी तथा आम नागरिकलाई नेपालका विविध पर्यटकीय अनुभव समेटिएका आकर्षक भिडियो निर्माण गरी टिकटकमा पोस्ट गर्न आह्वान गरेको छ। नेपालको सुन्दरता, संस्कृति, गन्तव्य र जनजीवनलाई आफ्नै दृष्टिकोणबाट प्रस्तुत गरिएका भिडियोले अन्तर्राष्ट्रिय दर्शकमाझ नेपालको पहिचान विस्तार गर्न तथा नेपाल भ्रमणका लागि प्रेरित गर्न महत्त्वपूर्ण भूमिका खेल्ने विश्वास बोर्डले लिएको छ।
बोर्डका निमित्त कार्यकारी प्रमुख अधिकृत हिक्मतसिंह ऐरले डिजिटल माध्यममार्फत् नेपालको पर्यटन कथालाई विश्वभर पु¥याउन यस अभियानले महत्वपूर्ण अवसर प्रदान गर्ने बताए।
‘टिकटकजस्ता डिजिटल प्लेटफर्म सिर्जनात्मक सामग्रीमार्फत् नेपालको विविध पर्यटन अनुभवलाई विश्वसामु प्रस्तुत गर्ने प्रभावकारी माध्यम हुन्। यस अभियानबाट नेपालको प्राकृतिक सौन्दर्य, सांस्कृतिक सम्पदा, मौलिक जीवनशैली र यहाँका मानिसका आत्मीय अनुभवलाई विश्वभर पु¥याउन सबैसँग अनुरोध गर्दछु’, उनले भने, ‘तपाईंले बनाएको एउटा भिडियोले पनि कसैलाई नेपाल भ्रमण गर्न प्रेरित गर्न सक्छ।’
यस अभियानमा सहभागी हुन टिकटकमा #VisitNepal खोजी गरी अभियानसम्बन्धी सामग्री हेरेर भिडियोमार्फत् सहभागिता जनाउन सकिनेछ। भिडियो पोस्ट गर्दा #VisitNepal, #NepalCalling / #photoNepal ह्यासट्याग प्रयोग गर्न बोर्डले आग्रह गरेको छ। सबैको सिर्जनात्मक सहभागिताबाट नेपालको पर्यटन प्रवद्र्धनलाई थप व्यापक र प्रभावकारी बनाउन सकिने बोर्डको विश्वास छ।