भक्तपुरमा साहित्यकार लाकोजूको चर्चा

कला/संस्कृती

गृहपृष्ठ
कला/संस्कृती
भक्तपुरमा साहित्यकार लाकोजूको चर्चा

भक्तपुरमा साहित्यकार लाकोजूको चर्चा

आइतबार, फागुन ३, २०८२ एभरेष्ट पेडिया

भक्तपुर
बुक क्लब भक्तपुरले शनिबार साहित्यकार सूर्यप्रसाद लाकोजूसँग अन्तरसंवाद गरेको छ। कार्यक्रममा उनको साहित्य, जीवन, इतिहास, संस्कार र सिर्जनामाथि गम्भीर बहस गरियो।
कार्यक्रमको सुरुमा विराट मानन्धरले लाकोजूको जीवनी र साहित्यिक यात्रामाथि विस्तृत प्रकाश पारेका थिए। पनौतीको सांस्कृतिक र प्राकृतिक परिवेशमा जन्मिएर हुर्किएका लाकोजूले बाल्यकालदेखि नै जात्रापर्व, मठमन्दिर र स्थानीय संस्कारबाट प्रेरणा लिएका हुन्।
साहित्यले दिने आत्मिक आनन्दकै कारण आफू लेखन क्षेत्रमा सक्रिय बनेको लाकोजूले बताए। अन्तरसंवादका बीचबीचमा कविता वाचन गर्दै उनले देश, काल र परिस्थितिको चित्रणसमेत गरेका थिए।
कार्यक्रममा उनका कविता, मुक्तक, कथा, हाइकु, नियात्रा, अनुसन्धानमूलक निबन्ध, संस्मरण, अनुवाद तथा बालसाहित्यको चर्चा गरियो। कार्यक्रम सञ्चालक हरिसुन्दर छुकांले लाकोजूको लेखन यात्रा, चुनौती, अवसर र भविष्यका योजनाबारे जिज्ञासा राखेका थिए। जवाफमा लाकोजूले स्रष्टाको लेखनीले समाजमा सकारात्मक योगदान दिनुपर्छ भन्ने धारणा व्यक्त गरे।
अन्तरसंवादमा राजेश केसी, सृजना प्रजापति, पुरूषोत्तमलोचन श्रेष्ठ, श्रीराम कर्माचार्य र श्रीराम राईलगायतले लाकोजूका काव्य प्रवृत्तिगत विशेषता, प्रकृतिप्रेम, आध्यात्मिक संवेदना, सङ्घर्ष र योजनाबारे जिज्ञासा राखेका थिए।

प्रकाशित मिति: आइतबार, फागुन ३, २०८२ ०९:२६

प्रतिक्रिया दिनुहोस्