एसिड आक्रमणको विषयमा लेखिएको उपन्यास ‘चाँदू’ सार्वजनिक

सम्झना

गृहपृष्ठ
सम्झना
एसिड आक्रमणको विषयमा लेखिएको उपन्यास ‘चाँदू’ सार्वजनिक

एसिड आक्रमणको विषयमा लेखिएको उपन्यास ‘चाँदू’ सार्वजनिक

आइतबार, असार २१, २०८३ एभरेष्ट पेडिया

काठमाडौं ।
उपन्यासकार शिक्षाश्री केसीको उपन्यास ‘चाँदू’ सार्वजनिक भएको छ। एसिड आक्रमण र घरेलु यौन हिंसाबारे लेखिएको उपन्यास शनिबार नेपाल प्रज्ञा प्रतिष्ठानमा लोकार्पण गरिएको हो।
सङ्घीय सांसद धर्मराज केसी, पूर्व सांसद तथा एसिड पीडित विन्ध्यवासिनी कंसाकार, समीक्षक राजकुमार बानियाँ, प्रकाशक पुष्प पौडेल र उपन्यासकार लगायतले संयुक्त रुपमा लोकार्पण गरेका हुन्।
कार्यक्रममा पूर्वसांसद कंसाकारले आफू एसिड पीडित भन्दा पनि एसिड योद्धा रहेको र चाँदू पढ्दा चोटको पीडा आफ्नै जस्तो लागेको बताइन्।
‘एसिड आक्रमणले आफ्नो शरीरभन्दा पनि मन जलेको र चाँदूमा उल्लेख भएजस्तै आत्मविश्वासका कारण अहिलेको अवस्थामा आउन सफल भएकी हुँ’, उनले भनिन्।
समीक्षक बानियाँले चाँदू तेजाब आक्रमणको आख्यान मात्र नभएर सामाजिक अपराधमाथिको गम्भीर बहस भएको बताए।
‘यस उपन्यासमा तेजाब आक्रमणबाट निराश होइन, निखार आएको देखाइएको र त्यसका लागि आत्मविश्वास महत्वपूर्ण रहेको पाइयो’, उनले भने, ‘जेनजी पस्ता’ की लेखिकाको उपन्यास सफल बनेको छ।’
प्रमुख अतिथि सांसद केसीले सानो उमेरमै मानवीय समवेदनामा आधारित उपन्यास लेख्न सकेकामा उपन्यासकारलाई बधाई दिए।
उपन्यासकार शिक्षाश्रीले इन्जिनियरिङ अध्ययन र उपन्यास लेखन दुवै एकै समयमा गरेको र समय व्यवस्थापन गर्न गाह्रो भएको अनुभव सुनाइन्।
शिखा बुक्सद्वारा प्रकाशित उपन्यासको मूल्य ६ सय ९५ रुपैयाँ रहेको छ।

प्रकाशित मिति: आइतबार, असार २१, २०८३ १४:२१

प्रतिक्रिया दिनुहोस्