कैलाश मानसराेवर यात्राका लागि वैकल्पिक नाका खोल्न सरकारसँग माग

पर्यटन समाचार

गृहपृष्ठ
पर्यटन समाचार
कैलाश मानसराेवर यात्राका लागि वैकल्पिक नाका खोल्न सरकारसँग माग

कैलाश मानसराेवर यात्राका लागि वैकल्पिक नाका खोल्न सरकारसँग माग

शनिबार, असार २८, २०८२ एभरेष्ट पेडिया

काठमाडौँ। ट्रेकिङ एजेन्सिज एसोसिएसन अफ नेपाल (टान)ले रसुवागढीमा आएको बाढीले पुर्याएको जनधनको क्षति प्रति गहिरो दुःख व्यक्त गर्दै कैलाश मानसरोवर यात्रालाई सहज बनाउन वैकल्पिक नाका खोल्न सरकारसँग आग्रह गरेको छ।

असार २४ गते बिहान ३ बजेतिर चीनको स्वशासित क्षेत्र तीब्बतबाट आएको भीषण बाढीले रसुवागढीस्थित नेपाल–चीन जोड्ने मितेरी पुल बगाएको थियो। घटनामा कम्तीमा २० जना बेपत्ता हुनुका साथै केहीको मृत्यु भइसकेको र दर्जनौं संरचनाहरुमा क्षति पुगेको टानले जनाएको छ।

टानका महासचिव सोनाम ग्याल्जेन शेर्पाद्वारा जारी विज्ञप्तिमा मृतकहरुप्रति श्रद्धाञ्जली अर्पण गर्दै पीडित परिवारप्रति समवेदना प्रकट गरिएको छ। साथै टानले आफ्नो तर्फबाट उद्धार र राहत कार्यमा सक्रिय सहयोग गर्न सम्पूर्ण सदस्य एजेन्सी, ट्रेकिङ गाइड, पर्यटक यातायात व्यवसायी र सरोकारवालालाई आग्रह गरेको छ।

विज्ञप्तिमा मितेरी पुल बगाएसँगै कैलाश मानसरोवर जाने सडक मार्ग अवरुद्ध भएपछि हजारौं नेपाली तथा विदेशी तीर्थयात्री चीन प्रवेश गर्नबाट रोकिएको उल्लेख गरिएको छ। यस परिस्थितिमा टानले नेपाल सरकारसँग वैकल्पिक रूपमा तातोपानी, कोरला र हिल्सा नाकाबाट मार्ग खुला गर्न चीन सरकारसँग कूटनीतिक पहल गर्न आग्रह गरेको छ।

त्यस्तै, हाल काठमाडौंमै रोकिनु परेको विदेशी तीर्थयात्री तथा पर्यटकलाई समयमै भिसा उपलब्ध गराउने वातावरण बनाउन नेपालस्थित चिनियाँ दूतावाससँग समन्वय गर्न पनि टानले आग्रह गरेको छ।

प्रकाशित मिति: शनिबार, असार २८, २०८२ २२:१७

प्रतिक्रिया दिनुहोस्