दशैंअघि तातोपानी नाका सञ्चालनमा, कन्टेनरकाे आवागमन सुरु

विविध

गृहपृष्ठ
विविध
दशैंअघि तातोपानी नाका सञ्चालनमा, कन्टेनरकाे आवागमन सुरु

दशैंअघि तातोपानी नाका सञ्चालनमा, कन्टेनरकाे आवागमन सुरु

मंगलबार, असोज ७, २०८२ एभरेष्ट पेडिया

काठमाडौं। एक महिनादेखि अवरुद्ध तातोपानी–बाह्रबिसे सडक सञ्चालनमा आएपछि चीनसँगको प्रमुख व्यापारिक नाका तातोपानी हुँदै दशैंका सामान बोकेर आएका कन्टेनरहरूको आवागमन सुरु भएको छ।

तातोपानी भन्सार कार्यालयका प्रमुख राजेन्द्र चुडालका अनुसार चीनतर्फबाट तातोपानी भन्सार यार्डमा र त्यहाँबाट पुनः चीनतर्फ कन्टेनरहरू आवतजावत गर्न थालेका छन्।

गत भदौ ८ गतेदेखि लगातारको पहिरोले सडक अवरुद्ध हुँदा नेपाल–चीन व्यापार पूर्णरूपमा प्रभावित भएको थियो। डाक्लाङ, घट्टेखोला र कोदारी खण्डका पाँच स्थानमा खसेको पहिरो पन्छाउन चरिकोट सडक डिभिजनले एस्काभेटर, लोडर, टिपर र मजदुर परिचालन गरेको थियो।

स्थानीय बासिन्दाले दीर्घकालीन समाधानबिनाको काममा असहमति जनाएपछि केही समय सडक खुलाउने कार्य रोकिएको थियो। तर, ऊर्जा तथा भौतिक पूर्वाधार मन्त्री कुलमान घिसिङको निर्देशनमा असोज ३ गते सर्वपक्षीय बैठक बसेर सहमति भएपछि काम तीव्र भएको थियो।

सडक सञ्चालनसँगै नाकामा व्यापारिक गतिविधि फेरि सुचारु भएको छ। साथै, सरकारले पहिरोको दीर्घकालीन समाधानका लागि कात्तिक मसान्तभित्र ठेक्काको प्रक्रिया सुरु गर्ने र असार मसान्तसम्म स्थायी कार्यान्वयन गर्ने तयारी गरेको छ।

प्रकाशित मिति: मंगलबार, असोज ७, २०८२ ११:०१